25.  СҮЛЕЙМЕН ПАТШАНЫҢ ТАҒЫ БІР НАҚЫЛ СӨЗДЕР ЖИНАҒЫ

Төзімділікпен билеушіні сендірер

 

 1Бұлар да Сүлейменнің нақыл сөздері. Оларды жинақтағандар — ЯҺуда елінің патшасы Езекияның қызметкерлері.^*

 

 2Істі құпиялау — Құдайдың даңқы,

Оны зерттеп ашу — патшаның даңқы.

 

 3Аспанның заңғар, жердің терең екеніндей,

Патшаның ой-ниетін білмес ешкім түгелдей.

 

 4Күмісті қорытып қоспадан аластатар,

Саф күмістен зергер құнды ыдыс жасар,

 5Дәл солай патшадан сұмдарды аластатыңдар,

Патшаның тағы сонда әділдікпен нығаяр.

 

 6Патша алдында асқақтама,

Ұлықтар орнына тұрып алма,

7Мырзаңның көз алдында ұялғанша,

Саған игі, «жоғары шық» деп шақырса.

 

Көргеніңді сотқа айтуға асықпа,

 8Қарсыласың жеңіп шықса соңында,

Қайтесің өзіңді масқара қылғанда?

 

 9Көршіңмен мәселеңді жеке талқыла,

Басқа адамның бірақ сырын ашпа.

 10Әйтпесе естіп қалған сені балағаттар,

Масқараң өзіңде мәңгілік қалар.

 

 11Орнымен айтылған сөз күміс табаққа

Салынған алтын алмадай тамаша.

 

 12Тыңдар құлаққа дананың әшкересі

Алтын сырға, саф алтын әшекей іспетті.

 

 13Жазғы орақ кезіндегі

Сергіткен қар секілді,

Иесінің жанын сергітеді

Жіберген сенімді елшісі.

 

 14Бермес сый-тартуымен мақтанушы

Құрғақ жел Һәм жаумас бұлтқа ұқсайды.

 

 15Төзімділікпен билеушіні сендірер,

Майда тілмен қарсыласты көндірер.^*

 

 16Бал таба қалсаң

Же оны шамаңа қарап,

Артық жеп қойсаң

Жиренерсің құсып тастап.

 17Көршіңе тым жиі барып

Кетірме қадіріңді,

Сенен мезі болып

Жек көріп кетер өзіңді.

 

 18Өзгеге қарсы жалған куә болған —

Сойыл, семсер, үшкір жебедей қауіпті жан.

 

 19Опасызға үміт арту апатты күні,

Бұл — сынған тіс, сал болған аяқ іспетті.

 

 20Салқын күні басқаның шапанын тартып алған,

Яки жарақатқа^* сірке су құйған жан

Сияқты — қайғылыға көңілді өлең айтқан.

 

Жауың аш болса, тамақтандыр

 

 21Жауың аш болса тамақтандыр,

Егер шөлдесе шөлін қандыр!

 22Мұныңмен сен басына оның

Қызып тұрған шоқ жиғандай боласың,^*

Һәм Тәңір қайтарар саған қарымтасын.

 

 23Солтүстік самал жаңбыр жаудырар,

Жала жапқыш тіл ашулы кейіп туғызар.

 

 24Ұрысқақ әйелмен бір үйде тұрғанша,

Үй төбесіндегі күркеде тұрған артық^* оңаша.

 

 25Алыс елден жеткен жақсы хабар

Шөлдегенге берілген салқын кәусарға ұқсар.

 

 26Арамзадан қорқып, көнген әділ жан —

Бүлінген құдық, бұлақтай лайланған.

 

 27Балды тым көп жеу пайдалы емес,

Өз даңқы үшін ұмтылу абырой бермес.

 

 28Өзіне ие бола алмайтын жан

Қорғансыз қаладай, қамалы құлаған.

Ақымаққа қадір жараспас>>>