19.  Өсиетті сақтаған өмірін сақтар

 1Жалған тілді наданнан^*

Адал жүрген жарлы артық.

 

 2Білімсіз құлшыныс жаман болар,

Тым асыққан жолдан таяр.

 

 3Өз ақымақтығы адамның жолын бұзар,

Содан ол Жаратқанға наразы болар.

 

 4Байлық достарды молайтар,

Кедей бар досынан да айырылар.

 

 5Жалған куә жазасыз қалмас,

Өтірік айтқыш құтыла алмас.

 

 6Мырзаға^* жағынуға көп жұрт әуес,

Сыйлық бергенмен барлығы да «дос».

 

 7Кедей жанды бар туысы жек көрер,

Достары солардан бетер одан безер,

Сөйлессем деп талпынғаны болар бекер.

 

 8Парасатқа ие болған өз жанын ұнатар,

Естілікке мән берген игілік табар.

 

 9Жалған куә жазасыз қалмас,

Өтірік айтқыш тірі қалмас.

 

 10Салтанатты өмір наданға жараспас,

Бастықтарды билеу малайға жараспас.

 

 11Даналығы адамға сабыр сыйлар,

Қатені кешіру оған құрмет болар.

 

(Өсиетті сақтаған өмірін сақтар)

 

 12Патшаның ашуы — ақырған арыстандай,

Ал ризалығы — шөптің ғанибет шығындай.

 

 13Ақылсыз бала әкесінің күйреуі болар,

Ұрысқақ әйел аққан тамшыдай^* жүйкені жұқартар.

 

 14Үй мен мал-мүлік — мұраң әке-шешеден,

Ақылды әйелің — сыйың Жаратқан Иеден.

 

 15Жалқауды ұйқы басар,

Енжардың қарны ашар.

 

 16Өсиетті сақтаған өмірін сақтар,

Жолына ден қоймаған ажалға ұшырар.

 

17Жарлыны қамқорлаған —

Жаратқанға қарыз бергені,

Игі істерінің есесін

Жаратқан қайтарып береді.

 

 18Балаңды жөнге сал үміт барда,

Өмірінің күйреуіне кінәлы болма.

 

 19Ашушаң жан лайықты жазасын тартсын,

Кешірсең болды, тағы жазалауға мәжбүрсің.

 

 20Ақылды тыңдап, нақылға^* бағын,

Алдағы кезде дана боларсың.

 

 21Жүрегінде адам жоспар құрар,

Ал Жаратқанның ұйғарымы жүзеге асар.^*

 

 22Адамның ұнамдылығы — берік мейірімі,

Өтірікшіден гөрі жарлы болғаны игі.

 

 23Жаратқанды қастерлеу шын өмірге бастар,

Жанына тыныштық сыйлап, пәледен қорғар.

 

 24Жалқау қолын табаққа салар,

Ал аузына апаруға жалығар.

 

 25Мазақшылды жазаласаң, аңғырт жан да ұғынар,

Естіге тек ескертсең, ол содан сабақ алар.

 

 26Әкесін тонап, шешесін қуған ұл —

Ар-ұждансыз, жексұрын бұл.

 

 27Балам, тәлімді тыңдауды^* тоқтатқаның —

Білімді сөзден бас тартқаның.

 

 28Жалған куәгер әділ сотты мазақтар,

Зұлымдар аузымен жамандықты жалмар.

 

 29Мазақшыл адамға үкімі даяр,

Қыңыр ақымаққа жазасы даяр.

Адалдық пен даналық>>>